AKUTAGAWA

Өглөө охиноо хүргэж өгөөд 8.10 гэхэд ажил дээрээ гозойдог болоод байгаам. Эрт ирэхээр блог сээгий нтр эргүүлээд харин ч зүгээр юм. Өглөө босуул юу гэдэг билээ дээ.

Өглөөний ундаа уунгаа хуучин сонин гарчиглав. Миний нэг муу зуршил. Идэж байхдаа уншиж байдаг. Камертоны Эба ярилцлага өгчээ. Мань хүн газар тариалан эрхлээд, тариа будаа ургуулаад чамгүй амжилттай явж байгаам байна шдээ. Тээд урьд нь 4000 доллараар гадуур хувцас худалдаж авч байсан. Одоо чанартай л бол хаана үйлдвэрлэсэн нь нээх сонин биш болсон. Гангарахаа больсон гээд ярьжээ. Өмнө нь уншиж байсан ч өнөөдрийнх шиг сэтгэгдэл төрүүлсэнгүй. Их эрүүлжиж байгаа хүн байна гэсэн гэгээн бодол төрлөө.

90-ээд оноос хойш мөнгийг шүтсэн, эд баялгаараа уралдсан систем рүү бид орчлоо. Хан-Уулын Дэмбэрэл бол "феодализм" гэж шууд нэрлэсэн байна лээ. Хүний хөлсийг сорон мөлжигч гэж хуучин хичээл заалгаж байлаа шдээ. Ийм л хэлбэр рүү эргэлт буцалтгүй орчлоо. Эдэлж хэрэглэж байгаагаараа уралддаг, нэгнийхээ дээр гарах гэсэн явуургүй сэтгэлгээтэй болчихож. Өөрийн мэдэлгүй ийм болж байна л даа. Намайг 270 мянгаар гар утас авсныг харсан эгч маань харамсаад, халаглаад, нүд ам нь янз бүр болоод шогшроод салахгүй байсан. Та нар ямар аймаар үнэтэй юм хэрэглэдэг юм бэ гээд загнаад эхэлж байгаам биш үү. Өөрөө бол үсрээ л 20 долларын утас чүү чамай /харамлан байж гэжуагаа/ барьдаг гэнэ. Америкууд ч их прагматик л даа. Харин Монголд 8810 барьчихсан явуул ирээдүйд биш юмаа гэхэд өнөөдөр хэн ч биш болно.

Тээд Эба энгийн болоод үнэтэй юмны хойноос хөөцөлдөхөө больжээ. Мобикомоос 1 сая төгрөгөөр Блэйкберри худалдаж авсан, муу утас байна лээ гэж ярьж байна. Үнэ мөнгөний хойноос хөөцөлдсөн, нэг нэгнийхээ дээр гарах гэсэн энэ зуурдын, явцгүй, мулгуу сэтгэлгээ аажим аажмаар алга болж байгаа нь сайшаалтай юм. Залуучууд бүр жийп унахыг мөрөөддөг болж. Би ч гэсэн мөрөөддөг. Гэхдээ одоо лав биш, өөрийн хөлс хүчээ урсгаж байгаад магадгүй 20 жилийн дараа унана гэсэн бодолтой явдаг. 

Ямар ч байсан нийгэм маань бага багаар эрүүлжиж байгаам байна. Феодализмын энэ муухай өвчнөөсөө салж байгаам байна. Шар толгойтнуудад хааяа атаархдаг юм. Цэвэрхэн л бол ямар ч хамаагүй хувцас өмсчихөөд, хаана ч хамаагүй хөлөө жийгээд суучихсан байдаг. Их энгийн. Өөрт тааламжтай бол хэнд юу гэж харагдах нь сонин биш. Нэг Итали нөхөр ийм олон жийптэй нийслэл анх удаа харлаа гэж бичсэнийг манайхан ална тална гэж бөөн юм болсон доо. Эм хэдий гашуун ч эдгэрэхэд тустай л байж л дээ, одоо бодоход. Манай улс ядуу байна. Тиймээс хүнд муугаа харуулахгүй гэж гангардаг биз ээ. Удахгүй манай улс мөнгөтэй болохоор энэ муухай өвчин алга болох байх.

Нийгэм маань тусдаг өвчнөө тусаад эдгэрч л байгаам байна. Сүүлийн үед хүмүүс жаахан мөнгөтэй болоод эрүүл мэндийн сонин, сэтгүүл их захиалдаг болж. Нийгэмд эрүүл хүн хэрэгтэй биз ээ. Хоолны нэвтрүүлэг, ДВД, СД, сонин их захиалж, худалдаж авч уншдаг болж. Гэр бүлийнхээ эрүүл мэндэд анхаардаг болж. Энэ бол бас л нэг гэрэл гэгээтэй илааршил юм даа гэж.